Wapendwa Wasichana, Sasa mko katika hatua muhimu sana ya safari ya mafanikio. Mnapata fursa ya kujifunza na kuandaa maisha yenu ya baadae. Mkiwa shule mtajifunza kuhusu masomo, na kujipanga kuhusu aina za kazi mnazotaka kuzifanya mkimaliza masomo. Wengi mna ndoto mbalimbali za maisha, lakini kuna changamoto nyingi sana katika jamii zetu, mojawapo ni fursa za ajira. Changamoto hizi mnaweza kuzishinda endapo mtafanya maamuzi yanayoongozwa na taarifa sahihi. Kupitia mafunzo haya ya Femina ya “Jenga Maisha Yako” mtajifunza kuhusu kujitegemea, thamani ya kuanzisha biashara yako, aina mbalimbali za biashara, usimamizi wa fedha, namna ya kushinda changamoto na kufanya uamuzi bora. Katika mafunzo haya ya Femina Hip ya “Jenga Maisha Yako” mtaweza: b KUWA JASIRI, na kujua kwamba mnaweza kufanikiwa kama wasichana wafanyabiashara. b KUPATA TAARIFA kuhusu misingi ya kufanya biashara. b Kutumia maarifa hayo KUWA MAKINI na kutafuta masoko na fursa mpya. Mafunzo haya yanawahusu NINYI tu. Yameandaliwa kuwa shirikishi na tunategemea mtafurahia sana! Kutakuwa na fursa nyingi kwenu kushiriki katika majadiliano na shughuli nyingine. Zungumza bila kuogopa, acha wengine wote darasani wajue una nini cha kusema. Sauti yako ni muhimu.